बन्दिपुर, पुस १५
बन्दिपुर गाउँपालिका–६ खहरेटारमा रहेको मिलिजुली युवा क्लवको छैठौं बार्षिकोत्सव तथा तमु ल्होसारको अवसरमा आइतबारदेखी खहरेटारमा बृहत सांस्कृतिक कार्यक्रम तथा खुल्ला गाउँ तथा टोल स्तरीय भलिवल प्रतियोगिता आयोजना गरिएको छ । प्रतियोगिता पुस १८ गतेसम्म चल्नेछ ।
क्लवले विगतदेखी तमु भाषा, संस्कृति, सभ्यता र पहिचानलाई जगेर्ना तथा संरक्षण गर्ने उद्देश्यले १५ पुस तथा तमु ल्होसारको अवसरमा बृहत सांस्कृतिक कार्यक्रम गर्दै आएको र यसपटक छैठौं बार्षिकोत्सवको अवसरमा खुल्ला गाउँ तथा टोल स्तरीय भलिवल प्रतियोगिता आयोजना गरिएको क्लवका संस्थापक अध्यक्ष एवं कार्यक्रमका मुल संयोजक सिद्धान्त गर्जामगरले बताए । सो कार्यक्रमको स्थायी शिक्षक हकहित संरक्षण मन्चका केन्द्रीय अध्यक्ष रमेशबाबु भट्टराईले उद्घाटन गरे ।
उक्त सांस्कृतिक कार्यक्रममा राष्ट्रिय तथा स्थानीय कलाकारहरु बलविक्रम थापा, संजिव सिं राना, अनुराग थापा मगर, उषा लामिछाने, खेमराज थापा, मनिषा मगर, भौमाया गुरुङ, मनु राना मगर लगायतको सांस्कृतिक प्रस्तुती रहनेछ ।
भलिवल प्रतियोगिता तर्फ भने प्रथम हुने टिमलाई ५५ हजार ५५५ रुपैयाँको साथमा खसी, द्वित्तिय हुनेलाई ३३ हजार ३३३ रुपैयाँको साथमा बोका र तृतिय हुने टिमलाई २२ हजार २२२ रुपैयाँको साथमा २ वटा भाले पुरस्कार दिईने छ ।
यसैगरि चौंथो हुनेलाई ८ हजार ८८८ र सान्त्वना हुने टिमलाई ४ हजार ४४४ रुपैयाँ नगद पुरस्कार दिईने छ । पुरस्कृत टिमलाई ट्रफी, मेडल र प्रमाणपत्र पनि प्रदान गरिने कार्यक्रम संयोजक मगरले जानकारी दिए । भलिवल प्रतियोगितामा भाग लिनकोलागि ५ हजार रुपैयाँ प्रवेश शुल्क तोकिएको छ । भलिवल प्रतियोगितामा २८ वटा टिमको सहभागिता रहनेछ ।
सो अवसरमा आइतबार रत्नहरी मेमोरियल अस्पताल दमौलीको प्राविधिक सहयोगमा निशुल्क स्वास्थ्य परिक्षण समेत आयोजना गरिएको थियो । सो अवसरमा १५० जनाको स्वास्थ्य परिक्षण गरिएको क्लवले जनाएको छ ।
क्लवका अध्यक्ष रामबहादुर गुरुङको अध्यक्षतामा सम्पन्न सो कार्यक्रममा प्रमुख अतिथी भट्टराई, नेपाल शिक्षक शिक्षक संघ तनहुँका सचिव नरेन्द्र वाग्ले, क्लवका संस्थापक अध्यक्ष सिद्धान्त थापा मगर लगायतले मन्तव्य राखेका थिए ।
