दमौली, फागुन १४
तनहुँ प्रहरीले निषेधित औषधी सहित तिन जनालाई पक्राउ गरेको छ । गत फागुन १२ गते दिउँसो आँबुखैरेनी गाउँपालिका वडा–४ बेनिटार स्थित पृथ्वी राजमार्ग सडकखण्डमा सवारी साधनहरु चेकजाँचको लागी खटिएको प्रहरी टोलीले मुग्लिङबाट आँबुखैरेनी तर्फ आउदै गरेको ग २० प ५४९९ नम्बरको मोटरसाइकललाई आबुखैरेनी गाउँपालिका–२ ट्राफिकचोकमा रोकी चेकजाँच गर्ने क्रममा मोटरसाइकल पछाडी सवार जिल्ला गोरखा पालुङटार नगरपालिका–८ का २३ बर्षिय आशिष पाण्डेले भिरेको झोलाभित्र लुकाई राखेको अवस्थामा ट्रामाडोल लेखिएको ३० वटा पत्ता (९०० ट्याब्लेट) र अनार्गन लेखिएको १८ वटा पत्ता (९०० ट्याब्लेट) फेला परेको हुँदा उक्त निषेधित औषधी वरामद गरी निज पाण्डे र मोटरसाइकल चालक जिल्ला गोरखा पालुङ्टार नगरपालिका–८ का १९ बर्षिय आश्विन पाण्डेलाई नियन्त्रणमा लिईएको प्रहरीले जनाएको छ ।
उनीहरुलाई गत २०७५ साउन २४ गतेको नेपाल सरकार स्वास्थ्य तथा जनसंख्या मन्त्रालय औषधी व्यवस्था विभागको निर्णय अनुसार आवश्यक कारवाहीको लागी औषधी व्यवस्था बिभाग बिजुलीवजार काठमाण्डौ पठाईएको जिल्ला प्रहरी कार्यालयले जनाएको छ ।
यसैगरि सोही दिन आँबुखैरेनी गाउँपालिका–४ बेनिटार स्थित पृथ्वी राजमार्ग सडक खण्डमा सवारी साधनहरु चेकजाँचको लागी खटिएको प्रहरी टोलीले मुग्लिङ तर्फबाट आँबुखैरेनी तर्फ आउदै गरेको ग १ ख ४३०९ नम्बरको माईक्रो बसलाई रोकी चेकजाँच गर्ने क्रममा माईक्रो बसमा पार्सलको रुपमा नियन्त्रित औषधी ट्रामाडोल लेखिएको ९ पत्तामा २७० ट्याब्लेट आबुखैरेनी गाउँपालिका–१ बरादी बस्ने बर्ष २३ को सनिस गुरुङले पाउने गरी पठाएको अवस्थामा फेला परेको हुँदा उक्त औषधी खरिद गर्ने सनिस गुरुङलाई जिल्ला तनहुँ बन्दिपुर गाउँपालिका–५ याम्पाबाट पक्राउ गरिएको प्रहरीले जनाएको छ ।
पक्राउ परेका गुरुङलाई पनि गत २०७५ साउन २४ गतेको नेपाल सरकार स्वास्थ्य तथा जनसंख्या मन्त्रालय औषधी व्यवस्था विभागको निर्णय अनुसार आवश्यक कारवाहीको लागी औषधी व्यवस्था बिभाग काठमाण्डौ पठाईएको जिल्ला प्रहरी कार्यालयले जनाएको छ ।
