भरतपुर, फागुन १७
भरतपुर महानगरपालिकाको आयोजनामा शुक्रबार हुने भरतपुर भ्रमण वर्ष-२०२४ को उद्घाटन कार्यक्रममा प्रधानमन्त्री पुष्पकमल दाहाल प्रचण्ड सहित पाँच पुर्व प्रधानमन्त्री पनि आउने भएका छन् ।
‘घुमौँ भरतपुर’ भन्ने नारासहित हुन लागेको भरतपुर भ्रमण वर्ष २०२४ को भोलि शुक्रबार औपचारीक रुपमा उद्घाटन गरिँदै छ ।
नारायणी नदी किनारमा भव्य कार्यक्रम गरेर उद्घाटन हुने भ्रमण वर्ष २०२४ को उद्घाटनको लागि प्रधानमन्त्री पुष्पकमल दाहाल प्रचण्ड भने आजै चितवन आउँदै छन् ।
कार्यक्रममा प्रधानमन्त्री प्रचन्ड सहित पुर्व प्रधानमन्त्रीहरु नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली, नेकपा एकीकृत समाजबादीका अध्यक्ष माधवकुमार नेपाल, नेकपा एसका सम्मानित नेता झलनाथ खनाल र मन्त्रीपरिषदका अध्यक्ष खिलराज रेग्मी पनि भरतपुर आउने भएका छन् ।
उद्घाटन कार्यक्रममा पूर्वप्रधानमन्त्री डा. बाबुराम भट्टराइलाई पनि निमन्त्रणा दिईएपनि भट्टराई उपस्थित हुनेछैनन् ।
भ्रमण वर्षको उद्घाटन कार्यक्रममा करिब ५० हजार जना उपस्थित हुने महानगरको अनुमान छ । उद्घाटनअघि भरतपुरको चौविसकोठीबाट नारायणी नदी किनारसम्म विशाल र्याली निकालिँदै छ ।
भरतपुर भ्रमण वर्षमा पाँच लाख आन्तरिक र दुई लाख बाह्य पर्यटक भित्राउने लक्ष्य राखिएको छ ।
