देवघाट, चैत १०
देवघाट गाउँपालिकाद्वारा शनिबार आयोजित विषयगत शिक्षक समूह गठन कार्यक्रममा आफुलाई जानकारी नदिईएको भन्दै वडा नम्बर ४ का अध्यक्ष एवं सामाजिक विकास संयोजक मित्रलाल गुरुङले आपत्ति जनाएका छन् ।
देवघाट गाउँपालिकाको आयोजना एवं सामाजिक विकास कार्यालय तनहुँको सहयोगमा शनिबार देवघाटमा आधारभूत तह ( ६-८) र माध्यमिक तह (९-१२) का नेपाली, अंग्रेजी, गणित, सामाजिक र विज्ञान बिषयमा बिषयगत शिक्षक समूह गठन कार्यक्रम आयोजना गरिएको थियो ।
आफू गाउँपालिकाको सामाजिक विकास समितिको संयोजक भएपनि उक्त कार्यक्रममा राजनीतिक पहुँचको कारण आफुलाई नबोलाईएको वडा अध्यक्ष गुरुङले आरोप लगाएका छन् ।
वडा अध्यक्ष गुरुङले भनेका छन् ‘मलाई कुनै जानकारी छैन । म नाम को मात्र (थपानाको ) मात्र सामाजिक विकासको संयोजक रहेछु । राजनीतिक पावर र पहुँचको आधारमा बेवास्ता गरेकोमा देवघाट गाउँपालिका र सामाजिक विकास कार्यालय तनहूँलाई मुरी मुरी धन्यवाद भन्न मन लाग्यो ।’
सो कार्यक्रममा अंग्रेजी बिषयको संयोजकमा देउराम सारू, विज्ञान बिषयको संयोजकमा हरिविलास पौडेल, गणित बिषयको संयोजकमा टिकारम रेग्मी, सामाजिक बिषयको संयोजकमा वैकुण्ठ भट्टराई, नेपाली बिषयको संयोजकमा ऋषिप्रसाद घिमिरेलाई संयोजक चयन गरिएको थियो ।
उक्त कार्यक्रममा देवघाट गाउँपालिकाका उपाध्यक्ष भुवन सिं गुरूङ, वडा नम्बर ५ का अध्यक्ष एवं गाउँपालिकाका प्रवक्ता पुर्ण बहादुर कुँवर, गाउँपालिकाका शिक्षा शाखा अधिकृत होमनाथ लामिछाने, महिला बालबालिका तथा जेष्ठ नागरिक शाखा प्रमुख शुभद्रा भट्टराई लगायतले मन्तव्य राखेका थिए ।
