देवघाट, चैत १४
देवघाट गाउँपालिका–५ स्थित देवघाटधाममा प्रतिबन्धित लागु औषध कारोबार र प्रयोग गरेको आरोपमा प्रहरीले सोही वडाको भतेरीका २८ बर्षिय कृष्ण तामाङलाई बुधबार पक्राउ गरेको छ ।
तामाङले देवघाटमा विभिन्न प्रतिबन्धित लागु औषध विक्री वितरण गर्ने र प्रयोग समेत गर्ने स्थानीय बासिन्दाहरुको गुनासो आएपछि अनुसन्धानकोलागि उनलाई पक्राउ गरिएको इलाका प्रहरी कार्यालय देवघाटका इन्चार्ज कृष्णबहादुर बानियाँले बताए । तामाङले स्थानीय युवा तथा मजदुरहरुलाई लागु औषध विक्री गर्ने गरेको स्थानीय अभिभावकहरुले प्रहरी समक्ष गुनासो गरेका थिए ।
प्रहरीले यस अघि शंकास्पद स्थानमा पटक पटक खानतलासी गरेपनि आवश्यक प्रमाण नभेटाउँदा तामाङ कारवाहीबाट जोगिदैं आएको प्रहरी इन्चार्ज बानियाले बताए । यस पटक पीडित युवाका अभिभावकहरुले उजुरी तथा स्थानीय सन्चार माध्यमले पनि यस बारेमा समाचार लेख्न थालेपछि तामाङलाई अनुसन्धानकोलागि पक्राउ गरिएको उनले बताए ।
तर यस अघि तामाङले प्रहरीलाई प्रलोभनमा पारेर कारवाहीबाट जोगिदै आएको भन्ने आरोपलाई भने इन्चार्ज बानियाँले खन्डन गरेका छन् । पक्राउ परेका तामाङलाई थप अनुसन्धानकोलागि बुधबार नै इलाका प्रहरी कार्यालय आबुँखैरेनी पठाईएको बानियाले जानकारी दिए ।
