दमौली, चैत २५
नेपाली काँग्रेससँगको सत्ता सहयात्रा टुटेपछि नेकपा माओवादी केन्द्र गण्डकी प्रदेश सभाका संसदीय दलका नेता हरिबहादुर चुमान अव सरकारको नेतृत्व आफुले पाउनेपर्ने भन्दै पटक पटक राजधानी गए । उनले माओवादी केन्द्रका अध्यक्ष तथा प्रधानमन्त्री पुष्पकमल दाहाल र नेकपा एमालेका अध्यक्ष केपी शर्मा ओली समेतलाई भेटी सरकारको नेतृत्व यसपटक आफुले पाउनु पर्ने दावी प्रस्तुत गरेका थिए । यस अघिको सरकारमा पनि मुख्यमन्त्रीको दावेदार रहेका चुमान यसपटक मुख्यमन्त्री बन्न अलि बढि नै लागेका थिए ।
तर प्रधानमन्त्री प्रचण्ड र एमाले अध्यक्ष ओलीको विचमा गन्डकी प्रदेशको मुख्यमन्त्री एमालेलाई दिने सहमती भयो । सोही अनुसार एमाले संसदीय दलका नेता खगराज अधिकारी आइतबार दोश्रो पटक मुख्यमन्त्रीमा नियुक्ती भए । एमालेका अधिकारी मुख्यमन्त्री नियुक्ति भएपछि माओवादी संसदीय दलको बैठकले दलका नेता चुमानकै नेतृत्वमा सरकारमा जाने निर्णय गरेको थियो ।
चुमानले यसपटक गण्डकीमा जसरी पनि माओवादीले नेतृत्व पाउनुपर्ने भन्दै केन्द्रसम्मै दबाब दिए पनि असफल भएका थिए । यसअघि पनि पटक पटक मुख्यमन्त्रीको दाबी गरेर नपाएका माओवादी संसदीय दलका नेता चुमान गण्डकीमा दोस्रो कार्यकालसम्म आइपुग्दा तेस्रो पटक मन्त्री बनेका हुन् ।
गत पुस २६ गते एमाले–माओवादीकै सरकारमा खगराज मुख्यमन्त्री हुँदा चुमान भौतिक पूर्वाधार मन्त्री बनेका थिए । त्यो बेला पनि चुमानले मुख्यमन्त्रीको दाबी गरेका थिए । अहिले फेरि खगराज नेतृत्वकै सरकारमा चुमान मन्त्री बनेका हुन् । चुमान पहिलो कार्यकालमा पृथ्वीसुब्बा गुरुङ नेतृत्वको सरकारमा आन्तरिक मामिला तथा कानुनमन्त्री थिए ।
