दमौली, बैशाख १
सडकमा लत्रिएको बिजुलीको नाङ्गो तार छुँदा शुक्रबार व्यास नपा–५ पतेनीमा एक युवा घाइते भएका छन् । घाइते हुनेमा मकवानपुर जिल्ला भिमफेदी गाउँपलिका–१ घर भएका २५ बर्षिय भरतबहादुर थिङ रहेका छन् ।
व्यास नपा–५ को ठुलोटारबाट पतेनी तर्फ आउँदै गर्दा सडकमा लत्रिरहेको विजुलीको हाइटेन्सन लाईनको तार छुँदा थिङ गम्भिर घाइते भएका थिए । उनको उपचारको लागि तत्काल दमौली अस्पतालमा लगिएकोमा करेन्टको कारण शरिरका विभिन्न स्थानमा चोट लागेको र बोल्न नसक्ने अवस्था भएको कारण थप उपचारकोलागि भरतपुर अस्पताल चितवन पठाईएको जिल्ला प्रहरी कार्यालय तनहुँले जनाएको छ । उनको सोही अस्पतालमा उपचार भईरहेको छ ।
लामो समयदेखी उक्त स्थानमा बिजुलीको करेन्ट प्रवाह भएको नाङ्गो तार सडकमा लत्रिरहँदा पनि नेपाल विद्युत प्राधिकरणले कुनै वास्ता नगरेको स्थानीय बासिन्दाहरुले बताएका छन् । यस बारेमा नेपाल विद्युत प्राधिकरण दमौली वितरण केन्द्रमा पटक पटक जानकारी गराईएपनि उक्त कार्यालयबाट कुनै सुनुवाई नभएको एक स्थानीयले बताए ।
