दमौली, भदौ १२
तनहुँको बन्दिपुर अस्पताललाई स्वास्थ्य सामाग्री प्राप्त भएको छ । स्वास्थ्य तथा जनसंख्यामन्त्री प्रदीप पौडेलको निर्देशनमा स्वास्थ्य सेवा बिभाग टेकुले बन्दिपुर अस्पताललाई स्वास्थ्य सामाग्री उपलब्ध गराएको हो ।
स्वास्थ्य सामाग्री उपलब्ध गराउने बिषयमा कांग्रेस नेता रेशम गुरुङले सहजिकरण गरेका थिए । बिभागबाट उपलब्ध भएको ति स्वास्थ्य उपकरण बन्दिपुर गाउँपालिकाका अध्यक्ष सुरेन्द्र बहादुर थापाले बुझेका थिए ।
अस्पतालमा पर्याप्त मात्रामा स्वास्थ्य उपकरण नहुँदा उपचारमा समस्या भएपछि स्वास्थ्य सामाग्री मागको लागि बन्दिपुर गाउँपालिकाकी उपाध्यक्ष पन्चमाया गुरुङ काठमाडौं पुगी मन्त्री पौडेल सँग भेट गरेकी थिइन् । भेटका क्रममा उनले पर्याप्त स्वास्थ्य सामाग्री, उपकरण नहुँदा उपचारमा समस्या भएको गुनासो गर्दै सहयोग माग गरेकी थिइन् ।
मन्त्री पौडेल स्वास्थ्य सामाग्री उपलब्ध गराउने बिषयमा सकारात्मक हुनुका साथै अस्पतालको डाक्टरलाई चिरफारको तालिम समेत छिटै गराइ दिने प्रतिबद्धता जनाएका थिए । त्यसपछि स्वास्थ्य सामाग्री प्राप्त भएको उपाध्यक्ष गुरुङले बताइन् ।
स्वास्थ्य सेवा बिभागले उपलब्ध गराएको स्वास्थ्य सामाग्रीमा थर्मोकोगुलेटर, ईसिजि मेसिन, डेलिबरी बेड, सेन्ट्रिफ्युज मेसिन लगायत रहेका छन् ।
