दमौली, भदौ ३०
जिल्ला क्रिकेट संघ तनहुँ (क्यान) को साधारण सभा आइतबार सम्पन्न भएको छ । जिल्ला क्रिकेट संघ तनहुँ (क्यान) अध्यक्ष मदन तिमिल्सेनाको अध्यक्षतामा सम्पन्न उक्त कार्यक्रममा बोल्दै प्रमुख अथिति अनिल पाण्डेले तनहुँमा क्रिकेटले निकै राम्रो गरिरहेको र नेपालमा क्रिकेटको क्रेज निकै बढेको आफुले पाएको बताए । पाण्डेले जिल्ला क्रिकेट संघ तनहुँले महिला खेलाडीहरु उत्पादनमा जोड दिनुपर्ने पनि बताएका थिए ।
कार्यक्रममा क्रिकेट संघका केन्द्रिय सदस्य सुदिप शर्माले क्रिकेटले विश्वमा नेपालको नाम चिनाउने काम गरेको र क्रिकेट खेल्ने खेलाडीहरुको पनि भविष्य रहेको बताएका थिए । प्रादेशिक क्रिकेट संघ गण्डकी प्रदेशका उपाध्यक्ष प्रकाश पौडेलले पछिल्लो समयमा तनहुँले क्रिकेटको विकासमा उल्लेख्य काम गरेको बताएका थिए । उनले गत आर्थिक बर्षमा संचालन गरेको स्कुल लिग खेलले राम्रो संदेश दिएको बताए ।
सो कार्यक्रममा दमौली अस्पतालका पुर्व अध्यक्ष हरिराज कडेल, क्यान तनहुँका निवर्तमान अध्यक्ष ताराराम श्रेष्ठ, जिल्ला खेलकुद विकास समितिका तनहूँका कार्यालय प्रमुख शिवहरी पण्डित लगाएतले शुभकामना मन्तव्य राखेका थिए ।
कार्यक्रममा जिल्ला क्रिकेट संघ तनहुँका अध्यक्ष मदन तिमल्सेनाले बर्षिक प्रतिवेदन, आर्थिक प्रतिवेदन र भावि योजना प्रस्तुत गरेका थिए ।
