देवघाट, कार्तिक १२
देवघाट गाउँपालिका–५ स्थित चक्रवर्ती सामुदायिक वन उपभोक्ता समुहको अध्यक्षमा पुनः डिलबहादुर गुरुङ चयन भएका छन् । सोमबार सम्पन्न वन समुहको २६ औं साधारणसभा एवं १३ औं अधिवेशनबाट गुरुङको अध्यक्षतामा नयाँ कार्यसमिति चयन गरिएको छ ।
वन समुहको उपाध्यक्षमा खेमबहादुर राना, सचिव प्रेम थापा मगर र कोषाध्यक्षमा उषा नैनावस्ती चयन भएका छन् । यसैगरि सदस्यहरुमा भरिमाया गुरुङ, शुकमाया गुरुङ, भारती पौडेल, गणेश थापा, ऋषिराम सुवेदी, दधिराम सापकोटा र सानबहादुर परियार रहेका छन् ।
उक्त साधारणसभाको देवघाट गाउँपालिकाका अध्यक्ष तिलबहादुर थापाले उद्घाटन गरे । सो अवसरमा बोल्दै अधयक्ष थापाले सामुदायिक वनको आम्दानीबाट युवाहरुलाइ स्वरोजगार बनाउने कार्यक्रम सन्चालन गर्नुपर्ने बताए । उनले आज वनहरुमा रुख काट्ने काम मात्र भईरहेको तर अव आम्दानी पनि लिने काम गर्नुपर्ने बताए । वनमा गिठा, भ्याकुर, बास, अम्बा र महङ्गा खाले रुखहरु रोपेर आम्दानी गर्न सकिने अध्यक्ष थापाले बताए ।
देवघाट सबडिभिजन वन कार्यलयका प्रमुख कृष्णप्रसाद भट्टले वन सरसफाई र छाँट्ने काममा देवघाटका ३९ वटा वन मध्ये चक्रवर्ती सामुदायिक वन अगाडि रहेको बताए । वनको सुरक्षा रुख जोगाएर मात्र नहुने भन्दै उनले बाक्लो भएका रुखहरुलाई छाँटेर नयाँ रुखहरु हुर्काउनुपनी रहेको बताए ।
सामुदायिक वन उपभोक्ता महासंघका गन्डकी प्रदेशका सचिव केशवचन्द्र न्यौपानेले हामी स्वस्थ जिवन जिउनकोलागि पनि वनको संरक्षण गर्नुपर्ने बताए । उनले सामुदायिक वनहरुले युवालाई रोजगारी र विपन्नहरुलाई आय आर्जनको कार्यक्रम ल्याउनु पर्ने बताए ।
चक्रवर्ती सामुदायिक वन उपभोक्ता समुहका अध्यक्ष डिलबहादुर गुरुङको अध्यक्षतामा भएको उक्त कार्यक्रममा वन महासंघ जिल्ला वन महासंघ सदस्य भोजराज नैनावस्ती स्थानिय वन महांसघ देवघाटका अध्यक्ष प्रविण कार्की, वडा नम्बर ५ का वडा सदस्य यमबहादुर मगर, रानीवन सामुदायिक वनका सचिव इन्द्र माया गुरुङ, कालिका सामुदायिक वन समुहका अध्यक्ष कृष्णराज न्यौपाने, सीता सामुदायिक वन समुहका अध्यक्ष भानुभक्त न्यौपाने लगायतले शुभकामना मन्तव्य राखेका थिए ।
