दमौली, मंसिर २२
म्याग्दे गाउँपालिकाको सभाहलको शुक्रबार उद्घाटन गरिएको छ । वडा नम्बर ३ को बेल्टार स्थित ठुलो बगैंचामा निर्माण भएको सुविधा सम्पन्न सभाहलको गाउँपालिकाका अध्यक्ष श्रीप्रसाद श्रेष्ठ र उपाध्यक्ष बालकृष्ण घिमिरेले संयुक्तरुपमा उद्घाटन गरेका थिए ।
उक्त अवसरमा बोल्दै गाउँपालिकाका अध्यक्ष श्रीप्रसाद श्रेष्ठले गाउँपालिकाले पुर्वाधार निर्माणलाई पनि प्राथमिकता दिएको बताए । गाउँपालिकाको आफ्नै सभाहल भएपछि अव सभा, सम्मेलन तथा सांस्कृतिक कार्यक्रमकोलागि सहयोग पुग्ने र गाउँपालिका भित्रका संघ संस्थाहरुले लाभ लिन सक्ने अध्यक्ष श्रेष्ठले बताए ।
सुर्य÷एमएनसी लोयल जेभी पोखराले भ्याट रकम बाहेक २ करोड ९८ लाख ७२ हजार ६७१ रुपैयाँमा उक्त सभाहल निर्माण सम्झौता गरेको थियो । २०७७ चैत २६ गते निर्माण सम्झौता भएको र निर्माण गरिसक्नु पर्ने अवधि २०८१ असार ३० गते भित्रै सभाहल निर्माण सम्पन्न भएको प्रमुख प्रशासकीय अधिकृत नारायणप्रसाद अधिकारीले बताए ।
उक्त सभाहल निर्माणको लागि स्थानीय सरस्वती घिमिरेको परिवारले ८ आना जग्गा निशुल्क उपलब्ध गराएका थिए । उक्त सभाहलमा करिब ७ सय जनाको क्षमता रहेको छ ।
यसैगरि वडा नम्बर ४ को थर्पुमा निर्माण गरिएको १० शैयाको थर्पु अस्पताल सन्चालन पुर्व शुक्रबार नै अस्पताल भवनमा शुभसाईतको रुद्री पुजा लगाएको छ । उक्त अस्पतालको आगामी मंसिर २९ गते शनिबार स्वास्थ्य तथा जनसंख्या मन्त्री प्रदिप पौडेलले उद्घाटन गर्ने भएका छन् ।
