दमौली, पुस १

भानु नपा–७ चुँदी टहुरेपसल स्थित चन्द्रावती माविले ६१ औं वार्षिकोत्सव मनाउने तयारी गरिरहेको छ । विद्यालयले यही पुस ६ गते आफ्नो स्थापनाको ६१ औं वार्षिकोत्सव विभिन्न कार्यक्रम गरि भव्य रुपमा मनाउन लागेको हो ।

तनहुँ जिल्लाको दोश्रो हाईस्कुलको रुपमा स्थापना भएको उक्त विद्यालयले विभिन्न आरोह अवरोह पार गरि ६१ औं वार्षिकोत्सव आयोजना गर्न लागिरहेको सन्दर्भमा विद्यालयका पुर्व विद्यार्थीहरुले वार्षिकोत्सवको अवसर पारि विभिन्न सहयोग गर्ने योजना बनाईएको पुर्व विद्यार्थी समिर पण्डितले जानकारी दिए ।

वार्षिकोत्सवको अवसरमा उक्त विद्यालयको एसएलसी व्याच २०४५ समुहले विद्यालयको शैक्षिक स्तर वृद्धि तथा सुधारका लागि एक लाख रुपैयाँ बराबरको प्रोजेक्टर र शैक्षिक सामाग्री प्रदान गर्न लागिएको २०४५ सालमा एएएलसी उतिर्ण गरेका विद्यार्थी समिर पण्डितले जानकारी दिए ।

उक्त अवसर पारि दुई लाख रुपैयाँ बराबरको जुनियर रेडक्रस प्राथमिक स्वास्थ्य अक्षयकोष स्थापना गरिने तथा आफूहरुलाई अध्यापन गराउनु भएका गुरुहरुलाई दोसल्ला सहित सम्मानपत्र मार्फत सम्मान गरिने पण्डितले जानकारी दिए ।

उक्त विद्यालयबाट माध्यमिक शिक्षा अध्ययन पूरा गरेका सिनियर तथा जुनियर सम्पुर्ण विद्यार्थीहरुलाई आफूले अध्ययन गरेको विद्यालयको शैक्षिक उन्नयनमा हातेमाले गर्दै संयुक्त रुपमा भूतपूर्व विद्यार्थी समाज गठन गरि शैक्षिक गतिविधिमा आ–आफ्नो स्थानबाटसहयोग गर्न एसएलसी २०४५ ब्याचले आह्वान गरेको पण्डितले जानकारी दिए ।

६१ वर्ष अघि २०२१ सालमा पञ्चायती शासन कालमा त्यस क्षेत्रका शिक्षित युवाहरु मदन शर्मा, विजयराज आचार्य, भिम बहादुर अधिकारी, कुलप्रसाद खनाल, बासुदेव ढकाल, मेदिनीप्रसाद शर्मा पण्डित, शेषरमण खनाल, विश्वनाथ ढकाल, गंगा बहदुर कार्की, पूर्णभद्र पण्डित, भुवनसिंह थापा, भोजराज खनाल, बनमाली शर्मा लगायतका युवाहरुको सक्रियतामा पहिलो पटक मदन शर्माको काठमाडौं स्थित निवासमा बैठक बसी विद्यालय खोल्ने निर्णय गरि काठमाडौं बाट तनहुँ फर्कि तत्कालिन १२ वटा गाउँपञ्चायतको बैठक तनहुसुर गाउँ पञ्चायतका संयोजक देवीभक्त वाग्लेको अध्यक्षतामा बसी काठमाडौमा भएको निर्णय अनुसार चन्द्रावती हाईस्कुल नामाकरण गरि उक्त विद्यालय स्थापना भएको थियो ।