देवघाट, माघ ४
नेपाल राष्ट्रका प्रथम जगतगुरु वालसन्त मोहनशरण देवाचार्यले देवघाट असाध्यै महत्वपुर्ण तिर्थ भएको हुँदा यहाँ आएर स्नान गरेमा मोक्ष प्राप्ती हुने बताएका छन् । देवघाटमा जारी देवघाट महा–महोत्सवमा शुक्रबार आर्शिवचन दिँदै जगतगुरु वालसन्त मोहनशरण देवाचार्यले देवघाट असाध्यै महत्वपुर्ण तिर्थ भएको र माघ महिनाको कम्तीमा एक दिन देवघाटको कृष्णागन्डकी र त्रिशुलीको संगममा स्नान गरेमा मोक्ष प्राप्ती हुने बताए ।
‘त्रेतायुगमा भगवान रामचन्द्रले पनि देवघाटमा आएर नुहाएर जानु भएको हो, यो कुरा रामायणमा पनि उल्लेख गरिएको छ ।’ उनले भने ‘रामचन्द्र भगवान देवघाट आएर जसले देवघाटमा आएर स्नान गर्छ, त्यसले मोक्ष प्राप्त गर्छ ।’ उनले भने ‘अझ माघ महिनामा देवघाट आएर नुहाइयो भने सबै पाप पखालिन्छ ।’
देवघाटमा सयौं वर्ष अघि पनि विशाल यज्ञहरु हुने गरेको उनले बताए । विगतमा अरुलाई भिक्षा दिने देश अहिले अरुदेशसँग भिक्षा माग्ने अवस्थामा पुगेको छ । उनले देशलाई हिन्दु धर्म राष्ट्र बनाउनु पर्ने बताए ।
जगतगुरु वालसन्त मोहनशरण देवाचार्यले तनहुँको देवघाट गाउँपालिका–५ मा निर्माण हुन लागेको देवघाट दिव्यधामको शिला पुजन गरि निर्माणाधिन मातापिता सेवा आश्रमको अवलोकन गरेका थिए । उनलाई देवघाट महा–महोत्सवको संकल्पकर्ता इश्वरकृष्ण महाराजले देवघाट दिब्यधाम र मातापिता सेवा आश्रमको बारेमा जानकारी गराएका थिए ।
