देवघाट । जेठ ६
देवघाटधाममा सन्चालित गुरुकुलहरुमा अध्ययनरत विद्यार्थीलाई शैक्षिक सामाग्री वितरण गरिएको छ । सेवा र विकासका लागि युवा अभियानले मंगलबार हहिर सन्यास आश्रममा कार्यक्रम आयोजना गरि देवघाटमा रहेका पाँचवटा गुरुकुलमका करिब पाँच सय विद्यार्थीलाई शैक्षिक सामाग्री वितरण गरेको हो ।
प्राज्ञिक विद्यार्थी परिषद्को समन्वयमा देवघाटका गुरुकुलका विद्यार्थीलाई झोला, ज्यामिट्रिबक्स लगायतका शैक्षिक सामाग्री वितरण गरिएको सेवा र विकासका लागि युवा अभियानका राष्ट्रिय अध्यक्ष डा.देवेन्द्र कँडेलले जानकारी दिए । उनका अनुसार देशका १३ जिल्लामा केन्द्रित भएर गरिब तथा सिमान्तकृत समुदायका विद्यार्थीलाई लक्षित गर्दै शैक्षिक सामाग्री वितरण भइरहेका छन् ।
यसका लागि ५५ लाख रुपैंया बजेट विनियोजन समेत गरिएको कँडेलले जानकारी दिए । अभियान मार्फत युवा विद्यार्थीलाई स्वरोजगार बनाउन कृषि र शैक्षिक क्षेत्रमा लगानी गरिएको उनले बताए ।
उक्त कार्यक्रममा महेश संस्कृत गुरुकुल विद्यापीठका प्राध्यापक पुजक बास्कोटाले विद्यार्थीका लागि शैक्षिक सामाग्री प्रदान गरेकोमा अभियानलाई धन्यबाद दिए । उनले नेपाली माटो र पूर्वीय दर्शनलाई माया गर्नेहरुलाई सहयोग गर्न समेत अनुरोध गरे । विद्यार्थी उज्वल पोखरेलले यस सहयोगले अध्ययनमा सहयोग पुग्ने बताए ।
