काठमाडौं । साउन ४
निर्वाचन आयोगले रुपन्देही–३ क्षेत्रको प्रतिनिधिसभा उपनिर्वाचनका लागि कार्यतालिका सार्वजनिक गरेको छ । आइतबार स्वीकृत कार्यतालिका अनुसार उम्मेदवारी दर्ता असोज २१ गते बिहान १० बजेदेखि बेलुका ५ बजेसम्म हुनेछ ।
उही दिन बेलुका ५ देखि १० बजेसम्म उम्मेदवारको प्रारम्भिक नामावली प्रकाशित गरिनेछ । त्यसपछि असोज २२ गते बिहान १० बजेदेखि दिउँसो ३ बजेसम्म उम्मेदवारविरुद्ध उजुरी दर्ता गर्न सकिनेछ । उजुरी छानबिन र निर्णय प्रक्रिया असोज २२ को दिउँसो ३ बजेदेखि असोज २३ को बेलुका ५ बजेसम्म चल्नेछ ।
असोज २३ गते बेलुका ५ देखि ९ बजेसम्म अन्तिम उम्मेदवार नामावली प्रकाशित गरिने आयोगले जनाएको छ । त्यसपछि, असोज २४ गते बिहान १० बजेदेखि दिउँसो ३ बजेसम्म उम्मेदवारी फिर्ता लिन सकिनेछ । फिर्ता भइसकेपछि, दिउँसो १ देखि ३ बजेसम्म अन्तिम उम्मेदवार सूची सार्वजनिक गरिनेछ र सोही दिन साँझ ३ देखि ६ बजेसम्म उम्मेदवारहरूलाई निर्वाचन चिह्न प्रदान गरिनेछ ।
निर्वाचन आयोगकी सहसचिव तथा प्रवक्ता नीता पोखरेल अर्यालका अनुसार मतदान कात्तिक १७ गते बिहान ७ बजेदेखि बेलुका ५ बजेसम्म सम्बन्धित मतदान केन्द्रहरूमा हुनेछ ।
