तनहुँ । साउन १४
ब्यास नगरपालिका वडा नम्बर १३ बेलवासका २६ बर्षीय कमलेस चन्द ठकुरी बेपत्ता भएको घटनाको अनुसन्धानको लागि ६ जना पक्राउ गरेको छ । ऋषिङ गाउँपालिका–१ झापुटारबाट गत साउन ७ गतेदेखि वेपत्ता भएका कम्लेसको अवस्था अझै अज्ञात रहेको छ ।
उक्त घटनाको अनुसन्धान गरेको प्रहरीले हालसम्म ६ जना पक्राउ गरेको छ । परिवारका सदस्यले पक्राउ परेका व्यक्तिहरु विरुद्ध किटानी जाहेरी दिएका छन् । चन्दका परिवारले जिल्ला प्रहरी कार्यालयमा गएर बेपत्ता सम्बन्धी कसूरमा उनीहरु बिरुद्ध किटानी जाहेरी दिएका हुन् । चन्द बेखबर भएको र उक्त घट्नामा ती व्यक्तिहरुको संलग्न रहेको पाइएपछि जाहेरी दर्ता गरिएको प्रहरीले जनाएको छ ।
उक्त घटनाको अनुसन्धानकोलागि गन्डकी प्रदेश प्रहरी कार्यालयबाट ३ जना विशेषज्ञ अनुसन्धान अधिकृतहरु दमौली आएका छन् । कमलेसका बुवा दिलबहादुर चन्दले झापुटारबाट साउन ७ गते रातिदेखि हराएको छोरोको अवस्था अज्ञात रहेको बताए । छोरोलाई केही युवाहरूले लखेटेर रहस्यमय तरिकाले बेपत्ता बनाएको उनले बताए । कसैले ढुङ्गा हान्ने कसैले धारिलो हतियार प्रहार गर्ने भन्ने सुनेको भन्दै दिलबहादुरले घटनाको निश्पक्ष अनुसन्धान हुनुपर्ने बताए ।
जिल्ला प्रहरी कार्यालय तनहुँका डिएसपी अशोक थापाले उक्त घटनाको अनुसन्धानकोलागि ६ जना संकास्पद युवाहरूलाई नियन्त्रणमा लिएको बताए ।
