तनहुँ । पुस १
दमौलीका खेलप्रेमी युवाहरु व्यास नपा–२ मा रहेको खेलमैदानको संरक्षणमा जुटेका छन् । व्यास नगरपालिकाको स्वामित्वमा रहेको उक्त खेल मैदानमा मेला÷महोत्सवको नाममा खेलमैदानको अस्तित्व नै संकटमा पर्न थालेको भन्दै दमौलीका युवाहरुले उक्त खेल मैदानको संरक्षण गर्न माग गरेका छन् ।
मंगलबार व्यास नगरपालिका र जिल्ला प्रशासन कार्यालयमा छुट्टाछुट्टै ज्ञापनपत्र बुझाउँदै दमौलीका युवाहरुले उक्त खेल मैदानमा खेलकुँदका कार्यक्रम मात्र गर्न दिनुपर्ने माग गरेका हुन् । दमौलीको विभिन्न क्लवमा आवद्ध युवाहरुले खेलमैदानको अस्तित्व जोगाउन र मेला महोत्सवको कार्यक्रम गर्न नदिन माग गरेका हुन् ।
दमौलीका युवा बासु सापकोटा, भुवन गोशेली लगायतले खेल मैदानको अस्तित्व नै समाप्त गर्ने किसिमका गतिविधि हुन थालेपछि आफुहरु जुटेको बताए । उनीहरुले उक्त खेलमैदानमा मेला र महोत्सवको कार्यक्रम गर्र्न दिँदा खेलमैदानको स्वरुप बिग्रने चिन्ता गरेका छन् ।
व्यास नगरपालिकाको गत मंसिर २२ गते बसेको २२७ औं कार्यपालिकाको बैठकले नेपाल आदिवासी जनजाती महासंघ जिल्ला समन्वय परिषद तनहुँले यही पुस २४ देखी माघ ५ गतेसम्म गर्न लागेको आदिवासी जनजाती सांस्कृतिक तथा पर्यटन महोत्वसको लागि अन्तिम पटक भन्दै उक्त खेलमैदानमा महोत्सव आयोजना गर्न दिने निर्णय गरेको थियो । उक्त निर्णय पछि खेलमैदानको अस्तित्व मेटिने चिन्तामा खेलप्रेमीहरु छन् ।
विपि वन बाटिकामा रहेको उक्त खेलमैदानमा गत वर्ष व्यास नगरपालिकाले १५ लाखको लागतमा पुननिर्माण गरेको थियो । उक्त मैदानमा महोत्सवको नाममा खाल्डा खुल्डी खनिँदा मर्मतको कुनै काम नहुनेतर्फ चिन्ता व्यक्त गरिएको छ ।
व्यास नगरपालिकाका प्रमुख बैकुण्ठ न्यौपानेले महोत्सवको आयोजक पक्षसँग थप छलफल गरि यस बारेमा पुनः निर्णय गरिने बताएका छन् ।
