तनहुँ । पुस २४
आगामी फागुन २१ गते हुने प्रतिनिधि सभा निर्वाचनकोलागि निर्वाचन प्रहरी (म्यादी प्रहरी) को भर्ना खुलेको छ । निर्वाचन प्रहरी भर्ना छनौट तथा नियुक्ती समिति तनहुँले विहिबार सुचना प्रकाशन गरि यसबारेमा जानकारी गराएको हो ।
यसपटक तनहुँमा नेपाल प्रहरी र सशस्त्र प्रहरी अन्तर्गत रहनेगरि १७५२ जना निर्वाचन प्रहरी भर्ना गरिनेछ । निर्वाचन प्रहरीमा भर्ना हुन चहानेले पुस २५ गतेदेखी माघ १ गतेसम्म सार्वजानिक बिदाको दिनमा समेत जिल्ला प्रहरी कार्यालय तनहुँ र सशस्त्र प्रहरी बल नेपाल नम्बर २३ गण हेडक्वाटर मनकामना तनहुँको कार्यालयमा आवदेन दिन सकिनेछ ।
निर्वाचन प्रहरीमा भर्ना हुनकोलागि १८ वर्ष पुरा भई ५४ वर्ष ननाघेको हुनुपर्नेछ । त्यसबाहेक साधारण लेखपढ गर्न जान्ने, कुनै राजनीतिक दलमा आवद्ध नभएको, कुनै फौजदारी अभियोगमा अदालतबाट सजाय नपाएको तथा कुनै आतंकबादी तथा बिध्वंसात्मक संगठनको सदस्य नभएको हुनुपर्ने छ ।
निर्वाचन प्रहरीको कार्यअवधि ४० दिनको हुनेछ । निर्वाचन प्रहरीको रुपमा सेवा गरेवापत ४० दिनको एकमुष्ठ ३४ हजार ७७६ तथा नेपाल प्रहरी तथा सशस्त्र प्रहरीले प्राप्त गर्ने अनुसारको खाद्यान्न वापतको रकम पनि प्राप्त गर्नेछन् ।
