तनहुँ । पुस २६
शुक्लागण्डकी नगर उद्योग वाणिज्य संघको सातौं बार्षिक साधारणसभा शुक्रबार दुलेगौंडामा सम्पन्न भएको छ । साधारणसभाले आगामी माघ २८ गतेदेखी फागुन १० गतेसम्म पाँचौ संस्करणको शुक्लागण्डकी महोत्सव आयोजना गर्ने घोषणा गरेको छ ।
संघका अध्यक्ष समुन्द्रराम श्रेष्ठले माघ २८ गतेदेखि फागुन १० गतेसम्म महोत्सव सञ्चालन गर्ने तयारी गरेको जानकारी दिए । साधारणसभाको उद्घाटन गर्दै शुक्लागण्डकी नगरपालिकाका नगर प्रमुख कृष्णराज पण्डितले व्यवसाय राम्रो भए मात्र व्यवासायी आर्थिक रुपमा सक्षम भई स्थानीयदेखि सबै तहका सरकारलाई राजश्व संकलन हुने बताए ।
नेपाल उद्योग वाणिज्य महासंघ गण्डकी प्रदेशका उपाध्यक्ष सुर्य बहादुर भुजेलले दुई संघ एकिकरण भएरपनि शुक्लागण्डकीले महासंघबाट सदस्यता पाउन नसकेको बताँउदै एक भएर सदस्यता प्राप्तिमा लाग्न अपिल गरे ।
संघका अध्यक्ष समुन्द्रराम श्रेष्ठको अध्यक्षतामा भएको कार्यक्रममा लेखनाथ उद्योग वाणिज्य संघका पूर्व अध्यक्ष लक्ष्मीप्रसाद त्रिपाठी, संघका संस्थापक अध्यक्ष हरि कुमार श्रेष्ठ, शुक्लागण्डकी नागरिक समाजका अध्यक्ष उमानाथ पाठक, संघका बरिष्ठ उपाध्यक्ष सुमन सापकोटा, महासचिव सुजन श्रेष्ठ, उपमहासचिव विर्सना श्रेष्ठ, महिला उद्यमी संघकी अध्यक्ष मनिषा विक, वडा व्यवस्थापन समिति वडा नम्बर ४ का सभापति बालकृष्ण विक लगायतले बोलेका थिए ।
कार्यक्रममा सचिव सुजन श्रेष्ठले सचिवको र कोषाध्यक्ष कमल गैह्रेले कोषाध्यक्षको प्रतिवेदन पेश गरेका थिए । सोही अवसरमा तनहुँ उद्योग वाणिज्य संघ खैरेनीटार बजार इकाईका पूर्व सभापति रामलाल हिराचन र दुलेगौंडा इकाई सभापति डिल बहादुर श्रेष्ठलाई सम्मान गरिएको थियो ।
