तनहुँ । माघ ३
गत २०८१ असार २८ गते चितवनको सिमलतालमा पहिरोसँगै त्रिशूली नदीमा बेपत्ता भएको ‘गणपति डिलक्स’ बसको अवशेष १८ महिनापछि बालुवामुनी फेला परे पनि बाहिर निकाल्न भने निकै चुनौती भएको छ । सुरक्षाकर्मीको टोलीले गत आइतबारबाट उक्त बस निकाल्ने प्रयास गरिरहेपनि अहिलेसम्म खासै प्रगति भने भएको छैन ।
आँबुखैरेनी गाउँपालिका–५ स्थित दुन्द्राङबेँसीमा फेला परेको बागमती प्रदेश ०३–००१ ख २४९५ नम्बरको सो बस निकाल्न सुरक्षाकर्मीको टोली गत आइतबारदेखि निरन्तर खटिरहेको छ । जिल्ला प्रहरी कार्यालय तनहुँका प्रमुख प्रहरी उपरीक्षक टेकबहादुर कार्कीले बस निकै गहिरो लेदो, बालुवा र गेग्रानको थुप्रोमुनि पुरिएकाले निकाल्न समस्या भएको बताए ।
सुरुका केही दिन बसको केही भाग देखिए पनि हाल बाक्लो लेदोका कारण उत्खननमा प्राविधिक कठिनाइ आइपरेको एसपी कार्कीले जानकारी दिए । एसपी कार्कीका अनुसार नेपाली सेना, नेपाल प्रहरी र सशस्त्र प्रहरीको ७० जनाको संयुक्त टोलीले एकसातासम्म लगातार प्रयास गरेपनि बस निकाल्न सकिएको छैन ।
२०८१ असार २८ मा नारायणगढ–मुग्लिन सडकखण्डको सिमलतालबाट पहिरोसहित दुई बस त्रिशूलीमा बेपत्ता भएका थिए । बागमती प्रदेश–०३–००१ ख २४९५ नम्बरको गणपति र बागमती प्रदेश–०३–००६ ख १५१६ नम्बरको एञ्जल डिलक्स त्रिशूलीमा बेपत्ता भएका थिए । उक्त दुई बसमा सवार ६५ जनामध्ये ११ जनाको शव फेला परेको थियो भने तीनजना घाइते भएका थिए । उक्त दुर्घटनामा ५१ जना बेपत्ता भएका थिए ।
