तनहुँ । माघ २९
राष्ट्रिय स्वतन्त्र पार्टीका तनहुँ क्षेत्र नम्बर १ का उम्मेदवार डा.स्वर्णिम वाग्लेले तनहुँको बृहत्तर विकासकोलागि रास्वपाको नेतृत्वमा बन्ने सरकारले काम गर्ने बताए । विहिबार व्यास नगरपालिकाको वडा नम्बर ७ र १० का मतदातालाई भेट गर्दै वाग्लेले नेपाली जनताले परिवर्तन चाहिरहेको र अबको विकल्प रास्वपालाई स्पष्ट बहुमतसहित देश चलाउने जिम्मेवारी प्राप्त हुने बताए ।
सो क्रममा वाग्लेले त्यस क्षेत्रका मतदातालाई भेटी जनताको समस्या, आवश्यकता र विकासका अपेक्षाबारे छलफल गरेका थिए । पुराना गठबन्धनका नाममा हुने सत्ता–सम्झौता, तानातान र पद–लालचले देशलाई फेरि पनि ‘सरकार फेर्ने घनचक्कर’ मा फसाउने भन्दै उनले यसको प्रत्यक्ष असर विकास, लगानी, रोजगारी र नागरिक सेवामा पर्ने बताए ।
स्पष्ट एजेन्डा, सक्षम नेतृत्व र परिणाममुखी कार्ययोजनासहित हामी प्रभावकारी शासनका लागि अघि बढिरहेको भन्दै वाग्लेले आफुहरुसँग बहुमत माग्ने आधार र नेतृत्व पनि रहेको बताए । उनले रास्वपाको नेतृत्वमा अव देशले चाँडै नै मुहार फेर्ने समेत दाबी गरे ।
