तनहुँ । फागुन २७
तनहुँको मतगणना गर्दा यसपटक प्रत्येक वडाको छुट्टाछुट्टै गणना भयो । कुन वडाबाट कस्तो मत आयो भन्ने जानकारी हुने हुँदा राजनीतिक दलहरुकै सहमतीमा प्रत्येक वडाको छुट्टाछुट्टै गणना गरिएको थियो । यसअघि २०८० को उपनिर्वाचनमा पनि प्रत्येक वडाको छुट्टाछुट्टै गणना गरिएको थियो । प्रत्येक वडाको छुट्टाछुट्टै गणना हुँदा कुन वडामा कुन दलको अवस्था के रहेछ भन्ने प्रष्ट देखियो ।
मतपरिणाम अनुसार तनहुँ क्षेत्र नम्बर १ मा रहेको ४४ वडा मध्ये व्यास नपाको वडा नम्बर ८ मा मात्रै नेपाली काँग्रेसका उम्मेदवार गोविन्द भट्टराई अगाडी रहे भने बाँकी रहेको ४३ वटा वडामा राष्ट्रिय स्वतन्त्र पार्टीका उम्मेदवार स्वर्णिम वाग्ले पहिलो भए । नेकपा एमाले कुनै पनि वडामा पहिलो भएन । व्यास नपा वडा नम्बर ८ मा स्वर्णिमले ४८४ मत पाउँदा भट्टराईले ५५१ र एमाले उम्मेदवार भगवती न्यौपानेले १९ मत मात्र पाईन् ।
अझ रोचक त के भने नेपाली काँग्रेसका उम्मेदवार गोविन्द भट्टराईको वडा व्यास नपा ११ र नेकपा एमालेकी उम्मेदवार भगवती न्यौपानेको वडा भानु नपा–७ मा पनि रास्वपाका वाग्ले नै पहिलो भए । व्यास नपा ११ मा स्वर्णिमले १४५० मत ल्याउँदा भट्टराईले ११८१ र एमालेकी न्यौपानेले १७२ मत ल्याइन् । त्यसैगरि न्यौपानेको वडा भानु नपा ८ मा स्वर्णिमले ८९४ मत ल्याउँदा न्यौपानेले ५६१ र भट्टराईले २८३ मत पाए । त्यसैगरि नेपाली कम्युनिष्ट पार्टीका विद्या ढकालको वडा भानु नपा ४ मा ढकालले ५१ मत पाउँदा स्वर्णिमले ८६८, गोविन्दले ३८४ र भगवतीले ३४७ मत पाइन् ।
पालिका स्तरको मत परिणाम अनुसार देवघाट गाउँपालिकाबाट स्वर्णिमले २९२८ पाउँदा गोविन्दले १६५७ र भगवतीले ११०१ मत पाए । त्यस्तै आबुँखैरेनी गाउँपालिकाबाट स्वर्णिमले ४६७८ मत पाउँदा गोविन्दले ९३९ र भगवतीले ४०१ मत पाए । त्यसैगरि बन्दीपुर गाउँपालिकाबाट स्वर्णिमले ४६२९ मत पाउँदा गोविन्दले १७९८ र भगवतीले ७४५ मत पाए ।
त्यस्तै भानु नगरपालिकाबाट स्वर्णिमले १२२३५ मत पाउँदा गोविन्दले ५१५५ र भगवतीले २४९७ मत पाइन् । त्यस्तै व्यास नगरपालिकाबाट स्वर्णिमले १३५६२ मत पाए भने गोविन्दले ६६७८ र भगवतीले १०८४ मत पाइन् । यो मतपरिणामले डेढ वर्षपछि हुने स्थानीय तहको निर्वाचनमा प्रभाव पार्ने विश्लेषण गरिएको छ ।
