तनहुँ । फागुन ३०
तनहुँ क्षेत्र नम्बर २ का नेकपा एमालेका उम्मेदवार केदार सिग्देलले आफ्नो चुनाबी खर्च विवरण सार्वजानिक गरेका छन् । सिग्देलले शुक्रबार जिल्ला निर्वाचन कार्यालयमा चुनावको आम्दानी र खर्च विवरण बुझाएका छन् ।
सिग्देलले बुझाएको विवरण अनुसार निर्वाचन अवधिभर उनको खर्च १० लाख ९७ हजार २८० रहेको छ । उक्त रकममा १५ दिनकोलागि सवारी साधन प्रयोग वापत ३ लाख, दैनिक भ्रमणको खाना/खाजा वापत २ लाख ३४ हजार ८० रुपैयाँ, प्रतिबद्धता पत्र छपाई वापत ३ लाख १० हजार, व्यानर, कार्ड, स्वस्तिक छाप छपाई वापत १ लाख २५ हजार २ सय, झण्डा छपाई ९५ हजार, कार्यालय सन्चालन स्टेशनरी खर्च वापत १८ हजार र डिजाइन, फोटोकपी र टाईपिङ वापत १५ हजार रुपैयाँ गरि कुल १० लाख ९७ हजार २८० रुपैयाँ खर्च भएको छ । सिग्देलले निर्वाचन अवधिभर मोटरसाईकल ¥याली, गोष्ठि र आमसभा गरेनन् ।
यस्तै सिग्देलले निर्वाचनको लागि प्राप्त भएको आम्दानी पनि निर्वाचन कार्यालयमा बुझाएका छन् । उनका अनुसार इष्टमित्रहरुबाट प्राप्त ५ लाख ३४ हजार ८०, कृषिजन्य बस्तु विक्रीबापत प्राप्त भएको ३ लाख २५ हजार र शुभचिन्तक तथा कार्यकर्ताहरुबाट प्राप्त भएको रकम २ लाख ३८ हजार २ सय रुपैयाँ गरि कुल १० लाख ९७ हजार २८० रुपैयाँ आम्दानी भएको छ ।
