विष्णु मगर । देवघाट, बैशाख २२
देवघाट गाउँपालिका–५ स्थित तालवारी टोल विकास अन्तर्गतको झारखानीमा एकै प्रकारको पाँचवटा घर लस्करै रहेको छ । झट्ट हेर्दा कोलोनी जस्तो देखिने उक्त घर कोलोनी भने हैन । स्व.लोक वहादुर आलेका पाँच भाईले एकै ठाउँमा उस्तै स्वरुपका घर निर्माण गरेर उदाहरणीय काम गरेका छन् ।
दाजुभाई विच अंशबन्डा भएर मानो छुट्टिएपनि दाजुभाईको मन नछुट्टियोस् भनेर एकै ठाउँमा एकै प्रकारका घर बनाएर बसेको जेठा दाई इन्द्रबहादुर आलेले बताए । ‘परिवारलाई एउटै धागोमा बाँधेर राख्ने, सम्पत्ति मात्र होइन सम्बन्ध पनि जोगाउनु पर्छ भन्ने उद्देश्यले पाँचै भाईले एकै ठाउँमा एकै खाले घर बनाएर बसेको इन्द्रबहादुरले बताए ।
पाँच दाजुभाईको यस अघिको पुरानो काठको घर पनि एकै ठाउँमा एकै प्रकृतिको रहेको थियो, त्यो पुरानो घरलाई भत्काएर सोही ठाउँमा उस्तै घर बनाएर बसेको माईला केशबहादुर आलेले बताए । जेठा इन्द्रबहादुर, माइला केशबहादुर, साईला कुलवहादुर, काईला देउवहादुर र कान्छा टकवहादुर आलेले उस्तै खर्चमा एकै खाले घर बनाएर मिलेर बसेका छन् ।
आमा बुद्धि माया भने कान्छा भाइको घरमा बस्ने र खाना भने सबै भाईको भान्सामा पालैपालो खाने गरेकी छिन् । साना–साना समस्याहरु आइपर्दा पनि एक अर्कामा सहकार्य गरि समस्या हल गर्दै आएको र दाईले जे निर्णय गर्छन् उही कुरा सबै भाईहरुले मान्ने माइला केशबहादुरले बताए । आफुहरुविच आर्थिक, सामाजिक र भावनात्मक सहकार्य रहेको उनले बताए ।
सानो–सानो कारणले परिवार फुट्ने, दाजुभाई छुट्टिने प्रवृत्ति बढ्दै गएको अवस्थामा आफुहरुको कामले समाजमा सकारात्मक प्रभाव पार्ने कान्छा भाई टकबहादुरले बताए । एउटै आँगनमा बसोबास गर्नु केवल भौतिकरुपमा नजिकिने मात्र मात्र नभई आपसी विश्वास, सहयोग र आत्मीयताको सम्बन्ध पनि मजबुत हुने उनले बताए । उक्त पाँच घरको त्यो एउटै आँगन आज केवल बसोबासको ठाउँ मात्र नभई एकताको पाठशाला समेत बनेको छ ।
