तनहुँ । बैशाख २२
बन्दिपुर गाउँपालिका वडा नम्बर ३ मा अवस्थित रामकोट गाउँ मगर समुदायको मौलिक पहिचान बोकेको एक आकर्षक बस्ती हो । यहाँ मगर जातिको मात्र बसोबास रहेको छ, जसले यस गाउँलाई सांस्कृतिक रूपमा अझ विशिष्ट बनाएको छ ।
परम्परागत जीवनशैली, भाषा, रितीरिवाज र संस्कृतिको जिवन्त अनुभव लिन चाहनेका लागि रामकोट उत्कृष्ट गन्तव्यको रूपमा स्थापित हुँदै गएको छ । मगर समुदायको जीवनशैली नजिकबाट बुझ्न, अध्ययन तथा अवलोकन भ्रमण गर्न रामकोट उपयुक्त स्थान मानिन्छ । पछिल्लो समय आन्तरिक तथा बाह्य पर्यटकहरू यहाँ पुगेर गाउँले परिवेश, संस्कृति र परम्परागत जीवनशैलीको अनुभव लिने क्रम बढ्दो छ ।
रामकोटको पर्यटन विकासमा सामुदायिक होमस्टेहरूले महत्वपूर्ण भूमिका खेलेका छन् । यहाँ सञ्चालनमा रहेका होमस्टेहरूले पर्यटकलाई स्थानीय खानपान, कला, संस्कृति तथा परम्परागत रहनसहनसँग नजिक बनाउने काम गरिरहेका छन् । गाउँलेहरूको आत्मीय आतिथ्यता र सरल जीवनशैलीले बसाइलाई अझ सम्झनयोग्य बनाउँछ ।
हालै सञ्चालनमा आएको बन्दिपुर भिलेज सफारी सेवाले रामकोट पुग्न अझ सहज बनाएको छ । गाउँ घुम्न, बिदा मनाउन, वा मौलिक ग्रामीण अनुभव लिन चाहनेका लागि यो सेवा उपयोगी सावित भएको छ । सानो पहाड रामकोट चुलीको काखमा रहेको यो गाउँका झपक्क परेका घरधुरी, वर्षौँ पुरानो गोलघर, ढुङ्गाले छापिएका परम्परागत घरहरू र गाउँको शिरमा रहेको चौतारोले यहाँको सौन्दर्य थप बढाएको छ ।
रामकोट बन्दिपुर बसपार्कबाट भञ्ज्याङ चौतारा (प्याराग्लाइडिङ स्पट), मुच्चोक हुँदै पुग्न सकिन्छ । पैदल यात्रामा करिब डेढ घण्टा लाग्छ । साथै बन्दिपुर–खहरे–सेराटार मार्ग हुँदै सवारी साधनमा करिब ३० मिनेटमै रामकोट पुग्न सकिन्छ ।
