तनहुँ । जेठ १०
तनहुँ क्षेत्र नम्बर २ का प्रतिनिधिसभा सदस्य ई. श्रीराम न्यौपानेले भिमाद नगरपालिका–४ सियालेका अपाङ्गता भएका नागरिक कर्णबहादुर कुमाललाई ह्विलचियर प्रदान गरेका छन् । सांसद न्यौपानेले आइतबार कुमालको घरमै पुगेर ह्विल चेयर उपलब्ध गराएका हुन् ।
सांसदको रूपमा आफूलाई प्राप्त पारिश्रमिक सामाजिक कार्यमा लगाउने अभियान अन्तर्गत पहिलो पहिलो महिनाको पारिश्रामिक अपाङ्गता भएका व्यक्तिलाई ह्विल चेयर प्रदान गरिएको सांसद न्यौपानेले बताए । आफू राजनीतिमा व्यक्तिगत सुविधा वा लाभका लागि नभई राष्ट्रसेवा र जनताको हितका लागि आएको बताउँदै सांसद न्यौपानेले राज्यकोषबाट प्राप्त हुने सम्पूर्ण आर्थिक सुविधा समाजकै हितमा खर्चिने नीति अनुरूप पहिलो सहयोग हस्तान्तरण गरिएको स्पष्ट पारे ।
ह्विलचियर प्राप्त गरेपछि खुसी व्यक्त गर्दै कुमालले आर्थिक अभावले गर्दा ह्विलचियर किन्न नसक्दा ओछ्यानमै थुनिएर बस्नुपरेको भन्दै सांसद आफैँ घरमै आएर ह्विलचियर दिँदा नयाँ जीवन पाएको जस्तो लागेको बताए ।
