तनहुँ । जेठ २
घिरिङ गाउँपालिकाले सेवाग्राहीलाई कुराएको भन्ने सम्बन्धमा सामाजिक सन्जालमा भाईरल भएको एक भिडियोको बारेमा प्रष्टिकरण दिएको छ । स्वास्थ्य शाखाका प्रमुख कृष्णप्रसाद रिमालले आफुहरुले सेवाग्राहीलाई कुराएको नभई पोषण सम्बन्धी कार्यक्रममा भएको कारण आउनमा ढिलाई भएको बताएका छन् ।
गत जेठ ८ गते आफुहरु वडा नम्बर ४ को कार्यालय फुलामा सुनौलो हजार दिन सम्बन्धी कार्यक्रममा सहभागी भएको र कार्यक्रम सकेर आउने क्रममा केही ढिलाई भएको बताए । एक सेवाग्राहीले आफन्तको उपचार सम्बन्धी सिफारिसकोलागि गाउँपालिकाको स्वास्थ्य शाखामा आउँदा उक्त शाखामा कुनै पनि कर्मचारी नभएपछि सो बारेमा भिडियो बनाई सामाजिक सन्जालमा राखेका थिए ।
गाउँपालिकाको स्वास्थ्य शाखा, कृषि शाखा तथा पशु विकास शाखाका कर्मचारीहरुको उपस्थितीमा वडा नम्बर ४ मा ‘सुनौलो हजार दिनको आमाहरुलाई पोषण सम्बन्धी एकिकृत अभिमुखी कारण कार्यक्रम’ आयोजना गरिएको र ति सेवाग्राही पालिकामा आएको सुचना पाएपछि कार्यक्रम छोट्याएर हतार हतार पालिकामा आएको तर सेवाग्राहीले पालिका र कर्मचारीको बदनाम गर्ने गरि भिडियो सामाजिक सन्जालमा हालेको स्वास्थ्य शाखाका प्रमुख रिमालले बताए ।
कर्मचारी नभएको बारेमा ति सेवाग्राहीले भिडियो बनाएपछि गाउँपालिकाका नगरप्रहरीले उक्त भिडियो मेटाउन दवाव दिएको बारेमा भिडियोमा सुन्न सकिन्छ । स्वास्थ्य शाखाका प्रमुख रिमालले आफुले सेवाग्राहीलाई भिडियो मेटाउन दवाव नदिएको र पालिकामा आएपछि उनको सिफारिस बनाएर पठाईदिएको बताए । नगरप्रहरीसँगको विवाद बारेमा आफुलाई जानकारी नभएको उनले बताए ।
