तनहुँ । जेठ १४
गण्डकी प्रदेशको सार्वजनिक लेखा समितिले गण्डकी प्रदेशका विभिन्न सडकहरुको अवलोकन गरेको छ ।
सार्वजनिक लेखा समितिका सभापति सुधिर कुमार पौडेलको नेतृत्वमा गण्डकी प्रदेशका सांसदहरु तथा तनहुँका विभिन्न स्थानीय तहका प्रमुखहरुको उपस्थितीमा उक्त संसदीय समितिले विहिबार श्रृङ्ग मार्ग, कृष्ण मोटरमार्ग र कालीगण्डकी करिडोरको स्थलगत अवलोकन गरेको हो ।
अवलोकन पश्चात भिमाद नगरपालिकाको कार्यालयमा आयोजित कार्यक्रममा उक्त तिन सडकको बारेमा छलफल भएको छ । विशेषगरि श्रृङ्ग मार्ग र कृष्ण मोटरमार्गको स्तरोन्नतीमा भएको ढिलाईको बारेमा छलफल भएको थियो ।
कार्यक्रममा सार्वजानिक लेखा समितिका सभापती सुधिरकुमार पौडेल, गण्डकी प्रदेश सभाका सदस्यहरु जीत प्रकाश आले, रेशम जुग्जाली, पन्चराम गुरुङ, शुशिला सिंखडा र निर्मला थापा तथा भिमाद नगरपालिकाका प्रमुख दधिराज सुवेदी, ऋषिङ्ग गाउँपालिकाका अध्यक्ष राजेन्द्र कृष्ण श्रेष्ठ, घिरिङ्ग गाउँपालिकाका अध्यक्ष होम बहादुर थापा लगायतको सहभागिता रहेको थियो ।
