तनहुँ । असार १०
तनहुँका स्थानीय तह मध्ये सबैभन्दा धेरै बजेट व्यास नगरपालिकाको रहेको छ । व्यास नगरपालिकाले आगामी आर्थिक वर्षको लागि १ अर्व ५० करोड २० लाख १ हजारको अनुमानित आय व्यय प्रस्तुत गरेको छ । जसमध्ये चालु तर्फ ६८.१६ प्रतिशत अर्थात १ अर्व २ करोड ३७ लाख ६२ हजार र पुँजीगत तर्फ ३१.८४ प्रतिशत अर्थात ४७ करोड ८२ लाख ३९ हजार रहेको छ । नगर अधिवेशनमा उपप्रमुख इन्दिरा दरैले आगामी आर्थिक वर्षको अनुमानित आय व्यय सार्वजानिक गरेकी थिइन् ।
नगरसभाको ४५ औं अधिवेशनको पहिलो सत्रमा नगर प्रमुख बैकुण्ठ न्यौपानेले आगामी आर्थिक वर्षको ३१३ बुँदे नीति तथा कार्यक्रम प्रस्तुत गरेका थिए । उक्त नीति तथा कार्यक्रममा नगरसभाका सदस्यहरु गौकुमारी न्यौपाने, रन सिंह नेपाली, यज्ञ शर्मा, जिवन गुरुङ, राधा विक लागयतले विभिन्न सुझावहरु प्रस्तुत गरेका थिए । व्यासको आगामी नगरसभा असार २७ गते हुने भएको छ ।
नगर सभामा नगर प्रमुख वैकुण्ठ न्यौपानेले नीति कार्यक्रम पेश गरेका थिए । व्यास नगरपालिकाले पुर्वाधार विकास, कृषि, पर्यटन, शिक्षा, स्वास्थ्य, उद्योग, व्यवस्थित बसोबास र भुमि व्यवस्थापन, वन वातावरण तथा विपद् व्यवस्थापन, युवा तथा खेलकुँद, सुचना तथा सन्चार, आदिवासी जनजाती, दलित उत्थान, अपाङ्गता, जेष्ठ नागरिक, सुरक्षित बैदेशिक रोजगारी र सुशासन तथा दक्ष जनशक्तिलाई मुख्य बुँदामा बर्गिकरण गरि नीति तथा कार्यक्रम प्रस्तुत गरेको थियो ।
