देवघाट । साउन १७
राष्ट्रिय परीक्षा बोर्डद्वारा सञ्चालित वि.सं.२०८२ को कक्षा १२ को माध्यमिक शिक्षा परीक्षामा संस्कृत तर्फ नेपाल प्रथम हुने देवघाटस्थित महेश संस्कृत गुरुकुलका आयुष रिमाल र आयुष आचार्यलाई यसवर्षको विनाजा पुरस्कार प्रदान गरिएको छ ।
संस्कृत भाषाका छात्रहरूलाई प्रोत्साहन गर्ने उद्देश्यले स्थापित ‘विनाजा पुरस्कार’ कक्षा १२ को परीक्षामा नेपाल प्रथम हुने आयुष रिमाल र आयुष आचार्यलाई संयुक्त रुपमा प्रदान गरिएको हो । उक्त पुरस्कारको राशी ५१ हजार रुपैयाँ रहेको छ ।
आइतबार गुरुकुलमा आयोजित कार्यक्रममा महेश संस्कृत गुरुकुलका पिठाधश रमणानन्द गिरीजी महाराज र पुरस्कारका संस्थापकको तर्फबाट उक्त पुरस्कार रिमाल र आचार्यलाई प्रदान गरेका थिए । गुरुकुल परिवारले सर्वोत्कृष्ट स्थान हासिल गर्न सफल छात्रद्वयलाई बधाई ज्ञापन गर्दै आगामी शैक्षिक समुन्नति र उज्ज्वल भविष्यको शुभकामना व्यक्त गरेको छ । साथै, संस्कृत सेवामा निरन्तर समर्पित रहँदै यो प्रोत्साहन पुरस्कार स्थापना गर्नुभएकोमा पुरस्कारका संस्थापक सुभाष चन्द्र जाजोदियाप्रति गुरुकुल परिवारले हार्दिक साधुवाद एवं आभार प्रकट गरेको छ ।
संस्कृत शिक्षाको संरक्षण, सम्बर्धन र विकासमा योगदान पु¥याउँदै आएको देवघाटस्थित महेश संस्कृत गुरुकुल राष्ट्रिय परीक्षा बोर्डद्वारा सञ्चालित वि.सं.२०८२ को कक्षा १२ संस्कृत तर्फ देशकै सर्वोत्कृष्ट बनेको थियो ।
गुरुकुलबाट सहभागी भएका कुल १९ जना परीक्षार्थीमध्ये आयुष रिमाल र आयुष आचार्यले समान ३.९१ जिपिए ल्याएर नेपालभरिमै सर्वोत्कृष्ट अङ्क हासिल गरेका थिए । उक्त गुरुकुलका १० जना छात्रले ३.६० भन्दा माथि जिपिए र ९ जना छात्रले ३.४३ भन्दा माथि जिपिए प्राप्त गरेका थिए ।
