तनहुँ । साउन १७
तनहुँ क्षेत्र नम्बर २ का प्रतिनिधिसभा सदस्य ई.श्रीराम न्यौपानेले आइतबार शुक्लागण्डकी नगरपालिकाका विभिन्न स्थानमा ‘सांसद जनसंवाद कार्यक्रम–२’ को आयोजना गरेका छन् । उक्त कार्यक्रममा सांसद न्यौपानेले स्थानीयवासीका समस्या प्रत्यक्ष सुनेका छन् ।
सांसद न्यौपानेले आइतबार शुक्लागण्डकी नगरपालिका वडा नम्बर ३ को टार तथा वडा नम्बर ८ को पाटन चौतारीमा जनसंवाद कार्यक्रम आयोजना गरे । त्यस्तै साँझ तनहुँ क्षेत्र नम्बर २ घर भई पोखरा बस्दै आएका नागरिकहरुसँग ग्यालेक्सि पार्टी प्यालेश बिरौटामा जनसंवाद तथा अन्तरक्रिया कार्यक्रमको आयोजना गरेका थिए ।
उक्त सबै जनसंवाद कार्यक्रममा सांसद न्यौपानेले स्थानीयका गुनासा, विकास निर्माणका सुझाव तथा मागहरूबारे छलफल गरेका थिए । शुक्लागण्डकी वडा नम्बर ३ मा आयोजित कार्यक्रममा स्थानीयवासीले लामो समयदेखि अलपत्र परेको दुलेगौंडा–हर्कपुर सडकको स्तरोन्नति र कालोपत्रे गर्न आग्रह गरेका थिए । जवाफमा सांसद न्यौपानेले आगामी वर्षभित्र सडक पिच गर्ने लक्ष्य राखिएको र अब नयाँ ठेक्का प्रक्रियामार्फत सक्षम ठेकेदार चयन गरी निर्माण कार्यलाई तीव्रता दिने प्रतिबद्धता व्यक्त गरेका थिए ।
त्यस्तै वडा नम्बर ३ का विभिन्न स्थानमा ढलेका विद्युतका पोलहरू सोझ्याउने तथा कालोतार विस्तार गर्ने विषयमा पनि छलफल भएको थियो । यस समस्याको समाधानका लागि सम्बन्धित निकायसँग आवश्यक समन्वय गर्ने आश्वासन सांसदले दिएका छन् ।
विगतमा पनि पटक–पटक सडक र विद्युतका समस्या उठाउँदै आएका स्थानीयले यसपटक प्रतिनिधिसभा सदस्यसँग प्रत्यक्ष संवाद गर्न पाएकोमा खुसी व्यक्त गरेका थिए । तर, उनीहरूले अब सांसदका आश्वासन केवल आश्वासनमा सीमित नभई यथाशीघ्र व्यवहारमा परिणत भएको हेर्न चाहेको बताएका छन् ।
सांसद न्यौपानेले जनसंवाद कार्यक्रमको मुख्य उद्देश्य जनताका समस्या सुन्नु र तिनको समाधानका लागि पहल गर्नु रहेको बताए । आफुले गरेका सबै प्रतिबद्धताहरू समयमै कार्यान्वयन गर्नेमा आफ्नो प्रतिबद्धता रहने सांसद न्यौपानेले बताए ।
