तनहुँ । साउन २०
व्यास नगरपालिकाका दुई छुट्टा–छुट्टै स्थानमा दुई जना पुरुष अचेत अवस्थामा फेला परेका छन् ।
प्रहरीका अनुसार बुधबार अपराह्न करिब ४ बजे व्यास नगरपालिका–४ भोर्लेटार चोकस्थित भित्री सडक खण्डमा ग १ त ६३८२ नम्बरको ट्रयाक्टर चलाउन लाग्दा ट्याक्टर चालक चितवन भरतपुर महानगरपालिका–१२ घर भई हाल व्यास–१० बैरेनी बस्ने ५५ वर्षका काले लामा तामाङ अचानक बेहोस भएका थिए ।
तामाङलाई तत्काल उपचारका लागि प्रदेश अस्पताल दमौली पठाइएकोमा सामान्य उपचारपश्चात् थप उपचारका लागि साँझ ६ः३० बजे गण्डकी अस्पताल पोखरा रिफर गरिएको छ ।
यसैगरी, बुधबार साँझ ७ बजे व्यास नगरपालिका–२ अमरापुरी पानीघट्टास्थित बुल्दीखोलाको किनारमा अर्का एक पुरुष अचेत अवस्थामा फेला परेका छन् । नाम, थर र वतन नखुलेका अनुमानित ४०–४२ वर्षका पुरुष अचेत अवस्थामा रहेको जानकारी पाउनासाथ जिल्ला प्रहरी कार्यालयबाट प्रहरी टोली खटिएको थियो ।
प्रहरी टोलीले उनलाई तत्काल उद्धार गरी एम्बुलेन्समार्फत उनलाई उपचारका लागि प्रदेश अस्पताल दमौली पठाएको छ । अचेत अवस्थामा रहेका ती पुरुष हाल बोल्न नसक्ने अवस्थामा रहेको र उनको पहिचान खुलाउने प्रयास भइरहेको प्रहरीले जनाएको छ ।
