तनहुँ । साउन २१
बन्दीपुर गाउँपालिका–४ ठूलोढुङ्गास्थित हालै सञ्चालनमा आएको ‘चार्ज एन्ड डाइन स्टेसन’ अविरल वर्षापछि आएको पहिरोले क्षतिग्रस्त भएको छ ।
पहिरो पसेपछि चार्जिङ स्टेसनको भवन, डाइनिङ हल तथा किचनका सामग्रीहरू ढुङ्गा र माटोको लेदोले पुरिएका छन् । करिब १ करोड ३० लाख रुपैयाँको लगानीमा ७–८ महिना लगाएर निर्माण गरिएको उक्त स्टेसन करिब एक महिनाअघि मात्रै सञ्चालनमा आएको थियो ।
पहिरोले स्टेसनको मुख्य भवनसहित डाइनिङ हल र भान्साका सम्पूर्ण सामग्रीमा ठूलो क्षति पु¥याएको छ । पहिरोका कारण तत्काल होटल तथा चार्जिङ स्टेसन सञ्चालनमा ल्याउन सकिने अवस्था नरहेको सञ्चालकले जानकारी दिएका छन् ।
क्षति हुनबाट जोगिएका केही संरचना र सामग्रीहरू पन्छाउने तथा सुरक्षित स्थानमा सार्ने काम भइरहेको छ । सञ्चालनमा आएको महिना दिनमै पहिरोले करोडौँको क्षति पु¥याएपछि सञ्चालकहरू थप मर्कामा परेका छन् ।
