आबुँखैरेनी, पुस ४
आबुँखैरेनी गाउँपालिकाको आयोजना तथा आबुँखैरेनी अस्पतालको व्यवस्थापनमा यही पुस ७ गते शनिबार आबुँखैरेनी अस्पतालमा बृहत निशुल्क स्वास्थ्य शिविर हुने भएको छ ।
नेपाल प्रगतिशिल चिकित्सक संघ गन्डकी प्रदेश तथा प्रगतिशिल स्वास्थ्यकर्मी महासंघ नेपाल गन्डकी प्रदेशको प्राविधिक सहयोगमा हुने सो स्वास्थ्य शिविरमा हाडजोर्नी, फिजिसियन, स्त्रीरोग, नाक कान र घाँटी, दन्त सेवा र पेट, छाती तथा मुटुरोग सम्बन्धी स्वास्थ्य परिक्षण हुने भएको छ ।
सो स्वास्थ्य शिविरमा पेट, छाती तथा मुटुरोग सम्बन्धी विशेषज्ञ डा.बुद्धिबहादुर थापा, हाडजोर्नी तथा नशारोग विशेषज्ञ डा.दिनेशकुमार विक र सरोजचन्द्र दाहाल, नाक, कान र घाँटी सम्बन्धी विशेयज्ञ डा.विक्रम बाबु कार्की, महिला तथा स्त्रीरोग विशेषज्ञ डा. कालिका भण्डारी तथा आबुँखैरेनी अस्पतालका चिकित्सकहरुले स्वास्थ्य परिक्षण गर्ने छन् ।
शिविरमा निशुल्क एक्से, भिडियो एक्सरे, ल्याव सेवा तथा औषधी समेत निशुल्क उपलब्ध गराईने आवुँखैरेनी अस्पतालले जनाएको छ ।
आबुँखैरेनी गाउँपालिकाका अध्यक्ष शुक्र चुमानले उक्त बृहत स्वास्थ्य शिविरमा स्वास्थ्य परिक्षण गरि लाभ लिनु हुन आँबुखैरेनी गाउँपालिकाबासी तथा आसपासका स्थानीय तहमा बसोबास गर्ने नागरिकलाई अनुरोध गरेका छन् । नागरिकको स्वास्थ्यकोलागि आबुँखैरेनी गाउँपालिकाले आयोजना गरेको यो शिविरमा सहभागी हुन अध्यक्ष चुमानले सबैलाई अनुरोध गरेका छन् ।
