दमौली, पुस २३
नेपाली काँग्रेसले राष्ट्रिय सभा सदस्यकोलागि तनहुँका पदम परियारलाई उम्मेदबार बनाएको छ । व्यास नपा १ निवासी परियार गन्डकी प्रदेशको अपाङ्गता तथा अल्पसंख्यक क्लष्टरबाट उम्मेदबार बनेका हुन् । पदम हालका राष्ट्रिय सभाका सदस्य प्रकाश पन्थको रिक्त हुने कोटामा उम्मेदबार बनेका हुन् ।
सत्तागठबन्धनको तर्फबाट उम्मेदबार बनेको कारण पदमको जित निश्चित जस्तै छ । पदम अपाङ्गता अधिकारको क्षेत्रमा लामो समयदेखी क्रियाशिल छन् । उनी अपाङ्गता भएका व्यक्तिहरुको अधिकार र विकासकोलागि श्रोत केन्द्र रिसेडको अध्यक्ष समेत हुन् ।
गन्डकी प्रदेशबाट सत्ता गठबन्धनको तर्फबाट अन्य तर्फको क्लष्टरमा नेपाली काँग्रेसका किरणबाबु श्रेष्ठ र महिला क्लष्टरमा माओवादी केन्द्रकी मनरुपा शर्माले उम्मेदबारी दिएका छन् ।
नेकपा एमालेबाट भने अन्य क्लष्टरमा चक्रबहादुर पराजुली, महिलामा सम्झना देवकोटा र अपाङ्गता तथा अल्पसंख्यक तर्फ हेमेन्द्र सेरचनले उम्मेदबारी दिएका छन् ।
