दमौली, चैत १९
बन्दिपुर गाउँपालिकाको विभिन्न खानेपानी योजनाको लागि मन्त्री समक्ष बजेट माग गरिएको छ । बन्दिपुर गाउँपालिकाका अध्यक्ष सुरेन्द्र थापाको नेतृत्वमा सोमबार खानेपानी मन्त्री राजेन्द्रकुमार राईलाई भेटी पर्यटकीय नगरी बन्दिपुरमा खानेपानीको अभाव रहेको भन्दै बन्दिपुरका विभिन्न खानेपानी योजनाकोलागि आवश्यक बजेट उपलब्ध गराउन माग गरेका थिए ।
बन्दिपुर बजारमा खानेपानीको अभावले पर्यटकहरु बास बस्न समेत नखोज्ने अवस्थाले बन्दिपुरको पर्यटनलाई असर गरेको हुँदा बन्दिपुर खानेपानी आयोजनाकोलागि आवश्यक बजेट उपलब्ध गराउन अध्यक्ष थापाले मन्त्री राई समक्ष अनुरोध गरे । साथै बन्दिपुर गाउँपालिका अन्तर्गतका विभिन्न ६ वटा ठुला खानेपानी योजनाकोलागि पनि आवश्यक बजेट उपलब्ध गराउन अध्यक्ष थापाले मन्त्री राई समक्ष अनुरोध गरेका थिए ।
सो क्रममा मन्त्री राईले बन्दिपुरको खानेपानीको लागि आगामी आर्थिक वर्षको बजेटमा आवश्यक बजेट उपलब्ध गराउने प्रतिबद्धता जनाएका थिए ।
सो भेटमा राष्ट्रिय सभाकी सांसद भगवती न्यौपाने, बन्दिपुरका नेकपा एमालेका नेता इन्द्र कुँवर, वडा नम्बर १ का अध्यक्ष शिवकुमार श्रेष्ठ, बन्दिपुर गाउँपालिकाका अध्यक्षका स्वकिय सचिव अमिर गुरुङ लगायतको सहभागिता रहेको थियो ।
