दमौली, चैत २०
१३ वर्षीया बालिकालाई २०७९ असार ३२ गते बलात्कार गरेको आरोपमा पुर्पक्षकोलागि थुनामा रहेका म्याग्दे गाउँपालिका–५ का २३ वर्षीय सन्दिप विकलाई तनहुँ जिल्ला अदालतले १९ वर्ष कैद सजायको फैसला गरेको छ ।
जिल्ला अदालतका न्यायधीश आत्मदेव जोशीको इजलासले मंगलबार उक्त मुद्धामा अन्तिम फैसला गर्दै आरोपितलाई १९ वर्ष कैद र १ लाख रुपैयाँ क्षतीपुर्ती भराउने फैसला गरेको जिल्ला अदालतका श्रेस्तेदार केशव पौडेलले जानकारी दिए ।
आरोपितविरुद्ध बालिकाको आफन्तले २०७९ साउन १ गते इलाका प्रहरी कार्यालय भिमादमा उजुरी दिएका थिए । आरोपितले २०७९ असार २९ गते पोखराकी उक्त बालिकालाई मोटरसाईकलमा तनहुँको भिमाद बजारमा ल्याई एक गेष्ट हाउसमा राखी बलात्कार गरेको पीडित परिवारले उजुरीमा उल्लेख गरेका थिए ।
प्रहरीले विकलाई साउन १ गते पक्राउ गरेको थियो । प्रहरीले आरोपितविरुद्ध जिल्ला सरकारी वकिल कार्यालय मार्फत् साउन २६ गते बलात्कार सम्बन्धी मुद्दा जिल्ला अदालतमा दर्ता गरेकोमा अदालतको आदेशमा साउन २७ गतेदेखी उनी पुर्पक्षको लागि थुनामा थिए ।
