तनहुँ । माघ १५
तनहुँ क्षेत्र नम्बर १ बाट राष्ट्रिय स्वतन्त्र पार्टी (रास्वपा) का उम्मेदवार स्वर्णीम वाग्लेले निर्णायक बहुमतको आवश्यकता औँल्याएका छन् । विहिबार विहान सामाजिक सञ्जालमार्फत मतदातासँग समर्थनको आह्वान गर्दै उनले नेपाली जनताले परिवर्तन चाहिरहेको उल्लेख गरे । साथै उनले अबको स्पष्ट विकल्प रास्वपालाई बहुमतसहित देश चलाउने जिम्मेवारी दिनु रहेको बताए ।
तनहुँ क्षेत्र नम्बर १ अन्तर्गतको प्रसिद्ध छाब्दी बाराही मन्दिरको घन्टी बजाएको तश्विर सहित वाग्लेले लेखेका छन् ‘चुनावपछि पुरानै सत्ता–गणित दोहोरिए स्थिर सरकार सम्भव नहुने र त्यसले नीति निर्माण, सुधार तथा कार्यसम्पादनलाई जटिल बनाउने छ ।’
वाग्लेले पुराना गठबन्धनका नाममा हुने सत्ता सम्झौता, तानातान र पद–लालचले देशलाई फेरि ‘सरकार फेर्ने घनचक्कर’ मा फसाउने चेतावनी दिएका छन् । यसले विकास, लगानी, रोजगारी र नागरिक सेवामा प्रत्यक्ष नकारात्मक असर पर्ने उनले उल्लेख गरेका छन् ।
उनका अनुसार रास्वपासँग बहुमत माग्ने आधार, नेतृत्व र स्पष्ट एजेन्डा तीनै कुरा छन् । ‘स्पष्ट एजेन्डा, सक्षम नेतृत्व र परिणाममुखी कार्ययोजनासहित हामी प्रभावकारी शासनका लागि अघि बढिरहेका छौँ,’ उनले लेखेका छन् ।
छाब्दी बाराहीबाट वाग्लेले यस पटक देशलाई अघि बढाउने अवसर दिन मतदातासँग अनुरोध समेत गरेका छन् ।
