देवघाट अनलाइन
दमौली, बैशाख ३
नेपाली काँग्रेसले जिल्ला स्थित सरकारी भवनबाट चुनाव प्रचार गरेको छ । व्यास नपा ३ मा रहेको जिल्ला समन्वय समितिको स्वामित्वको जिल्ला अतिथी गृहमा युवाहरुको भेला राखेर काँग्रेसले चुनाव प्रचार गरेको हो ।
तनहुँको चुनावी कमान्डरको रुपमा खटिएका केन्द्रिय सदस्य तथा तनहुँ क्षेत्र नम्बर २ का सांसद शंकर भण्डारी एक सातादेखी सोही सरकारी भवनमा बसेर चुनावी कमान्ड सम्हालेका छन् । उनले दैनिक जसो सोही भवनबाट चुनावी रणनीति बनाईरहेका छन् । आईतबार पनि भण्डारीको पहलमा सरकारी भवनमा काँग्रेसका तरुण तथा विद्यार्थीहरुको भेला आयोजना गरिएको थियो ।
निर्वाचन आचार संहिताले सरकारी तथा सार्वजानिक भवनमा दलको झण्डा तथा चुनाव चिन्ह प्रर्दशन गर्न नपाईने उल्लेख गरेको छ तर काँग्रेसका कार्यकर्ताहरुले सरकारी गेष्ट हाउसको प्राङ्गणमा पार्टीको झन्डा तथा चुनाव चिन्ह प्रर्दशन गरेर सामुहिक तश्विर खिचेका छन् ।
