तनहुँ । मंसिर २३
घिरिङ गाउँपालिकाले राष्ट्रपती रनिङसिल्ड विद्यालय स्तरीय खेलकुँद प्रतियोगितामा पदक पाउने खेलाडी विद्यार्थी तथा प्रशिक्षकलाई सम्मान गरेको छ । मंगलबार गाउँपालिकामा आयोजित कार्यक्रममा पदक बिजेता खेलाडी तथा प्रशिक्षकलाई नगद पुरस्कार र प्रमाणपत्रद्वारा सम्मान गरेको हो ।
गत मंसिर १८ र १९ गते भिमाद रङगशालामा आयोजित राष्ट्रपती रनिङसिल्ड प्रतियोगितामा घिरिङ गाउँपालिका तेश्रो भएको थियो ।
गाउँपालिकाले विभिन्न पदक बिजेता २९ जना विद्यार्थीलाई सम्मान गरेको हो । गाउँपालिकाका अध्यक्ष होमबहादुर थापा, उपाध्यक्ष राधादेवी अधिकारी, प्रमुख प्रशासकीय अधिकृत कृष्णप्रसाद ढकाल, वडा नम्बर ३ का अध्यक्ष तहलसिंह थापा, गाउँपालिकाका शिक्षा तथा खेलकुँद शाखाका प्रमुख कृष्णप्रसाद सुवेदी लगायतले पदक बिजेता विद्यार्थी तथा प्रशिक्षकलाई सम्मान गरेका थिए ।
गाउँपालिकाले स्वर्ण पदक बिजेता खेलाडीलाई नगद २ हजार, रजत पदक बिजेतालाई १५ सय र कास्यपदक बिजेता खेलाडीलाई १ हजार रुपैयाँको साथमा प्रमाणपत्र सहित सम्मान गरेको हो । उक्त अवसरमा बोल्दै गाउँपालिकाका अध्यक्ष थापाले विद्यार्थीहरुको क्षमता तथा प्रतिभा प्रस्फुटनकोलागि गाउँपालिका सदैब लागि रहने बताए ।
