तनहुँ । माघ २२
राष्ट्रिय स्वतन्त्र पार्टी (रास्वपा) का उपसभापतिसमेत रहेका तनहुँ क्षेत्र नम्बर १ का उम्मेदवार स्वर्णिम वाग्लेले साइबर ब्युरोमा उजुरी दिएका छन् । झुटो विवरण तयार गरेर आफूविरूद्ध सामाजिक सञ्जालमार्फत् भ्रम फैलाइएको भन्दै त्यस्ता व्यक्तिहरूको पहिचान गरी कारबाही माग गर्दै वाग्लेले साइबर ब्युरोमा उजुरी दिएका हुन् ।
साइबर ब्युरोका एसपी दीपकराज अवस्थीले उपसभापति वाग्लेबाट उजुरी आएको बताएका छन् । ‘सामाजिक सञ्जालमा झुटा र भ्रामक समाचार सिर्जना गरी मानमर्दन र सामाजिक सौहार्दता खलब्ल्याउने कुनियतले सामग्री प्रचारप्रसार गर्नेहरू पत्ता लगाई हदैसम्मको कारबाही गरिपाऊँ’ भन्दै वाग्लेले उजुरी दिएका हुन् ।
धर्म र व्यक्तिगत अवस्थाबारे भ्रम सिर्जना गराउने काम भइरहेको पाइएको उनले दिएको उजुरीमा उल्लेख छ । नक्कली सामग्री सामाजिक सञ्जालहरूमा प्रशारण गरेको पाइएको पनि उनको भनाइ छ । अफवाह फैलाउने व्यक्ति र समूहहरू पत्ता लगाएर अनुसन्धान गरी कारबाही गर्न पनि उनले माग गरेका छन् ।
‘आफूलाई बागमती प्रदेशकी सांसद भनेर चिनाउने लक्ष्मी घिमिरे र मोहन लामा रूम्बाले प्रेषित गरेका सामग्रीले मेरो प्रतिष्ठामाथि आँच पु¥याउने खराब नियत राखेको पाएको छु,’ उनले साइबर ब्युरोमा दिएको उजुरीमा उल्लेख गरेका छन् ।
वाग्लेले विहिबार बन्दीपुर गाउँपालिकाको डुम्रे बजार सहित विभिन्न स्थानमा घर दैलो र मतदाता भेटघाट गरेका छन् । मतदातासँगको प्रत्यक्ष भेटघाटमा वाग्लेले जनताको समस्या, आवश्यकता र विकासका अपेक्षाबारे छलफल गरेका थिए । वाग्लेले तनहुँको बृहत्तर विकासकोलागि रास्वपाको नेतृत्वमा बन्ने सरकारले काम गर्ने बताए ।
