तनहुँ । माघ १५
नेपाली कम्युनिष्ट पार्टी तनहुँ क्षेत्र नम्बर १ का उम्मेदवार विद्यानाथ ढकालले तनहुँ क्षेत्र नम्बर १ नै आफ्नो सबैथोक भएको बताएका छन् । ‘यही क्षेत्रमै जन्में, यही हुर्कें, अहिलेसम्म जे गरेको छु, यसै क्षेत्रमा गरेको छु’ ढकालले भने ‘अव पनि बाँचुन्जेल यसै क्षेत्रमा काम गरिरहन्छु ।’ आफुलाई तनहुँ क्षेत्र नम्बर १ मा वर्षमा कतिपटक आएँ भनेर स्पष्टिकरण दिनुपर्ने हिनताबोध र बाध्यता नभएको ढकालले बताए ।
नेपाल कम्युनिष्ट पार्टी (नेकपा) तनहुँ क्षेत्र नम्बर १ निर्वाचन परिचालन कमिटिले विहिबार दमौलीमा आयोजना गरेको पत्रकार सम्मेलनमा बोल्दै ढकालले आफ्नो ६५ वर्षको उमेर तनहुँ क्षेत्र नम्बर १ मै बितेको बताए । ‘यहाँको भुगोल, यहाँको इतिहाँस, यहाँको सामाजिक रहनसन, शिक्षा, स्वास्थ्य, भौतिक पुर्वाधार, खानेपानी लगायतको सबै विषयसँग म गहिरोसँग जानकार छु’ ढकालले भने ‘क्षेत्र नम्बर १ मा साँच्चै जनताको मन जित्नेगरि, जनताको भावनाको कदर हुने गरि काम गर्नेछु ।’
जसले यहाँको भुगोल बुझेको हुन्छ, त्यसले मात्रै काम गर्ने ढकालको भनाई थियो । तनहुँ क्षेत्र नम्बर १ मा जनताको मन जित्नेगरि, जनताको भावनाहरुको कदर हुने गरि काम गर्ने भन्दै ढकालले देशभक्तीको भावनाका साथ अगाडी बढेको बताए । तनहुँ जिल्ला भित्र आफुले विगतदेखी नै भ्रष्टाचार विरुद्ध आवाज उठाउँदै आएको भन्दै उनले आफ्नो परिचय जिल्लामा भ्रष्टाचार विरोधी अभियन्ताको रुपमा पनि भएको बताए ।
देशको स्वाधिनता र अखण्डताको अहिले खतरामा परेको हुँदा पुनः एकपटक स्वाधिनता र अखण्डताको रक्षाकोलागि लड्नुपर्ने अवस्था आउन सक्ने भन्दै ढकालले नेपाली कम्युनिष्ट पार्टीको नेतृत्वले मात्रै देशको स्वाभिमान र अखण्डताको रक्षा गर्ने बताए । भ्रष्टाचार र विसंगतीको अन्त्यसँगै देशभित्रै रोजगारीको सिर्जना हुनुपर्ने र कोही पनि रोगजारीकोलागि बिदेश जानुपर्ने बाध्यताको अन्त्य हुनुपर्ने भन्दै उनले त्यो विषय आफ्नो मुख्य एजेण्डा भउको बताए ।
निर्वाचन क्षेत्र नम्बर १ निर्वाचन परिचालन कमिटिका संयोजक ओमकुमारी पौडेलको अध्यक्षतामा भएको उक्त पत्रकार सम्मेलनमा नेपाली कम्युनिष्ट पार्टीका केन्द्रीय सदस्यहरु हरिबहादुर चुमान, शिवलाल थापा, कलिला खान लगायतको उपस्थिती रहेको थियो ।
यसैविच ढकाललाई बिजयी गराउन आबुँखैरेनीमा १००१ सदस्यिय निर्वाचन परिचालन कमिटि गठन गरिएको छ । विहिबार आबुँखैरेनीमा भएको नेपाली कम्युनिष्ट पार्टीको भेलाले मिना अधिकारीको संयोजकत्वमा उक्त निर्वाचन परिचालन कमिटि गठन गरेको हो । साथै भेलाले हिमाल थापाको नेतृत्वमा २५१ सदस्यीय युवा/नवयुवा/जेनजी/वाईसिएल परिचालन समिती र द्वारिका श्रेष्ठको नेतृत्वमा ५१ सदस्यीय बुद्दिजिवी परिचालन समित गठन गरिएको छ । खगराज गौलीको अध्यक्षतामा उक्त भेला सम्पन्न भएको थियो ।
