दमौली, मंसिर १४
बिभिन्न मुद्धामा तनहुँ जिल्ला अदालतबाट दोषी ठहर भई हालसम्म फरार रहेका दुई जना प्रतिबादीहरुलाई तनहुँ प्रहरीले शुक्रबार पक्राउ गरेको छ ।
पक्राउ पर्नेमा बहुविवाह मुद्धामा दोषी ठहर भई फरार रहेका म्याग्दे गाउँपालिका–३ पसले गंगटे बस्ने ५१ बर्षीय बुद्धि बहादुर नेपाली र सवारी ज्यान मुद्धामा दोषी ठहर भई फरार रहेका म्याग्दे गाउँपालिका–४ घुम्ती बस्ने ५६ बर्षीय गोवर्धन राना मगर रहेका छन् ।
नेपालीलाई २०५६ मंसिर ८ गते तनहुँ जिल्ला अदालतले बहुविवहा मुद्धामा दोषी ठहर गरेको थियो । उनी सजाय स्वरुप तोकिएको १८ दिन कैद भुक्तान नगरी फरार रहेका थिए । त्यस्तै मगर सवारी ज्यान मुद्धामा २०६४ पुस ११ गतेको फैसलाले दोषी ठहर भएका थिए । उनी सजाय स्वरुप तोकिएको ५ दिन कैद भुक्तान नगरी हालसम्म फरार रहेका थिए ।
पक्राउ परेका उनीहरु दुबैलाई कैद सजाय भुक्तानकोलागि अदालतमा उपस्थित गराईएको जिल्ला प्रहरी कार्यालय तनहुँले जनाएको छ ।
